الجـــــــــــــــــــــزء الســـادس عشـــــــــــر
يوم الخمـــــــــــــــــيس
شي اكيد الحريم والرجال يكنون صاحين اما البنات والعيال نايمين..
ام ماجد: هالبنات الله يهديهم حياتهم مدري وشلون صايره..
ام مشاري: سهر ونوم واكل وما عندهم أي اهتمامات او مسئوليه..
ام فواز: ايه الحين هذا حال البنات هالايام ما يتعودون على المسؤليه واذا تزوجوا صار صعب عليهم عشان كذا تكثر حالات الطلاق..
ام سليمان: مو بس البنات حتى العيال اغلبهم ما يحب يكون عليه أي مسؤليه..
ام تركي: مو الشباب بس فيه ابوان انفسهم ما بعد حسوا بالمسؤليه..
ام مشاري: والله معاك حق يا ام تركي الحين ما نشره على الصغار بنشره على الكبار..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
عنـــــــــــــد الرجال
ابو مشاري: الله يهدي هالعيال حياتهم نوم في نوم..
ابو فواز: هم يا نايمين يا طالعين..
ابو ماجد: خلينا نروح نصحيهم..
ابو مشاري/ وانت صادق..
ابو فيصل: شكلهم امس سهرانين..
ابو فواز: احسن عشان مره ثانيه ينامون بدري زي العالم والناس..
ودخلوا الشياب عند الشباب وصرخوا عليهم كم صرخه وطلعوا...
مشاري لوليد: يا ليل ما اطولك..
وليد: ما يملون ابد..
طلال: يعني ايش كل يوم على هالحال..
ماجد: قوموا ترى عورني راسي بسبهم..
فواز: يا حبهم للصراخ..تصدقون اشتقت لزوجتي وهي تقومني..
فيصل: توك تذكرها..
طلال: زين ذكرها بشي زين طول اليوم الحمد لله افتكيت منهم الحمد لله ارتحت منهم..
فواز: يا ابن الحلال امزح اصلا انا ما اسوى شي بدون ام العيال والعيال بعد..
طلال: ايه واضح عيالك من اول ما جينا هنا وانت ما شفتاهم..
فواز: عند امي يعني في ايدي امينه.
فيصل: تصدق على بالي في ايدي سكينه هههاي..
فواز: هـ هـ هـ بصراحه تعرف تنكت يا خفيف الدم..
بعد شوي رجع ابو مشاري يتأكد انهم صحوا..
ابو مشاري: صحيتوا؟؟
الكل: ايه..
ابو مشاري: احسن تستاهلون "وراح"
مشعل: الحين ابوك وش فيه علينا..
مشاري: وش دراني عنه ..
طلال: شكله ابوي مسلطه علينا اعرف ابوي وحركاته..
وليد: لالا اكيد ابوي هو اللي مسلطه علينا..
طلال: يا ابن الحلال ابوي..
وليد: يا ولد الحلال انت ابوي..
مشاري: خلاص ارتاحوا ابوي..
طلال: تصدق ريحتنا..
وليد: هههه يا حليلنا من الفراغ اللي فينا ما ندري وش نسوي..
سليمان: خلونا نقوم قبل لا يرحع مره ثانيه ابو مشاري ويهزئنا..
الا بدخلة ابو ماجد: هاه صحيتوا؟؟
الكل: اوووف ايه..
ابو ماجد: ايه اشوا بعد..
ماجد: وش فيهم الحين...
مشاري: حسد من عند انفسهم..
طلال: خلونا نهبل فيهم ولا نصحى..
فواز: كان تلاقيهم في العنايه المركزه اسم الله عليهم..
مشاري: ومعاه انهيار عصبي..
قعدوا العيال يضحكون بعدين قاموا..
اما البنات فهم ما صحوا الا الساعه( 2)..
ام مشاري داخله على البنات: بتصحون ولا شلون..
عبير: لالا خالتي صحينا..
شجون: والله صحينا..
العنود: مين......وين.........كم الساعه..
عبير: العنود شاربه شي امس؟؟
العنود: شاربه.. ايه شاربه امس لبن قبل ما نوم..
عبير: خلاص خلاص فهمت السالفه اكيد منتهي صلاحيته..
العنود: ايه........هاه وش تقولين..
عبير حبت تهبل فيها مدامها صدقت: شربتي اللبن اللي كان هنا..
العنود: ايه...
عبير: متأكده شاربه اللي كان هنا..
العنود: ايه وش فيك ما تسمعين..
عبير: اللبن منتهي صلاحيته..
العنود: كذابه قولي والله ..طيب بكم يوم..
عبير: بخمسه او ستة ايام...
العنود بدى التمثيل عندها: بطني آه بطني يعورني عبير الحقي علي..
عبير ماسكه ضحكتها: يمه اختي تسممت وش اسوي الحين...
العنود :عبير عبير بموت بموت هاتي ورقه وقلم بكتب وصيتي..
عبير راحت تجيب ورقه وقلم: خذي يا اختي...ياربيه اختي بتروح مني ..مين لي غيرك يا العنود لا تروحين..
قعدت العنود تكتب وصيتها : عبير خذي هذي وصيتي عطيها امي آآآآآآ ه بطني بطني.وقولي لها اني احبها..
كانوا البنات واقفين يتفرجون على العنود وكذبتها..
عبير: بس امي.. وانا ما تحبيني..
العنود وهي تسوي نفسها تتألم: الا احبك بس لو تتركين عنك العجز كان اموت فيك..
البنات هنا خلاص ما قدروا يكتمون ضحتهم طلعوا شوي ضحكوا بعدين رجعوا...
عبير تمثل الصياح: العنود تكفين لا تموتين..
العنود: تصبري يا عبير آآآآآه بطني ..تصبري يا عبير هذا اللي ربي كاتبه لي..
عبير: طيب خليني اوديك المستشفى..
العنود: ما راح ينفع..انا كنت حاسه..
عبير: لا يمكن يعالجونك صح المرض مستعصي بس يمكن لا سمح الله..
العنود: لالا خليني اموت على فراشي بين اهلي وناسي..
عبير: طيب طولتي ما متي..
العنود: وجع ما بعد تمكن اللبن مني..
عبير: نصبر ان لله مع الصابرين..
العنود استوعبت انها تبيها تموت: صدق انك ما تستحين تبيني اموت طيب جامليني لحد ما اموت..
عبير: انا وحده صريحه وما احب المجاملات..
دخلت ام مشاري: هاه ما بعد صحيتوا..
البنات: الا صحينا..
ام مشاري: وش فيك يا العنود..؟؟
العنود لعبير: لا تقولين لها ما ودي اضيق صدرها..
عبير: ابشري.....لالا خالتي ما فيها شي تبي تنام..
ام مشاري: العنود اصحي ولا اقومك بطريقه ثانيه..
العنود صحت وكأنها الحصان: لالا خلاص قمت شوفيني في قمة النشاط..
بعدها البنات فقعوا ضحك على العنود النصابه..
العنود: خير...
ريم: وين اللي بتموت..
العنود: الحمدلله ربي ستر..
رغد: حسافه..
العنود: حسافه اوريك الحين..
وقاموا البنات يتطاقون طبعا مزح بس مزح العرابجه غير..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
عصــــــــــــــر يوم الخميس...
ريم: بنات من جد خلونا نستهبل..
العنود: كل وسائل الترفيه سويناها مدري وش بقى..
فجر: عندي فكره..
البنات: نورينا...
فجر: خلونا نلعب كوره..
ريم: ونااااااسه خلاص انا ياسر القحطاني..
العنود: وانا سعد الحارثي..
عبير: خلونا نروح الملعب بعدين قرروا وش تبون..
راحوا البنات للملعب وانقسموا فريقين فريق ريم وفريق العنود..
فريق ريم
عبير- مها – الهنوف)
فريق العنود( فجر- شجون – نوف)
وبدوا البنات لعب وانواع الدلع....سمعوا العيال صوت البنات ما صدقوا على الله وراحوا مصدر الصوت..
رغد كانت جالسه تصور البنات..
العيال صاروا يطلون على البنات من بعيد بحيث ما يلاحظونهم..
مشاري: اكشخ شوف البنات كيف يلعبون..
وليد: طبعا شوف العرابجه وشوف الدلع..
فيصل: لالا شوف اختي"بعدين استوعب" خير تطالعون محارمنا انت وياه..
مشاري: يله لفوا وجيهكم عيال اخر زمن ترى ان شفت ولد منكم طال على البنات قطعت رقبته قطع سامعين..
وليد يصغر صوته: حاضر يبه..
مشاري: ايه يا ولد خلك ما تسمع الكلام..
وليد: ولد في عينك يبه..
مشاري يخبط وليد خبطه اليمه: وترد بعد..
وليد: ترى بأرفسك يبه ما تنعطى وجه..
ماجد\: اقول خلونا ندور شي يوسع صدورنا فيه..
طلال: خلونا نودع الشرقيه ونروح نتمشى فيها وبكل ضواحيها..
فواز:اهم شي عاد وضواحيها وينى فيه في عنتر بن شداد وضواحيها..
قاموا العيال يضحكون وبعدين راحوا لسياراتهم وانقسموا لسيارتين وصاروا يتمشون..
البنات خلصوا الشوط الاول صفر –صفر طبعا لان كل ماجات الكوره وحده منهم ضيعتها يا ما تعرف تشوت ولا تخاف رجلها تعورها ولا انها حولا ...
طبعا ريم والعنود ضغطهم واصل مليون من دلعهم وعبير وفجر حراس فا اكيد راح ينتهي الشوط بالتعادل السلبي..
رغد: عاشوا عاشوا البنات..
ريم: والله عورني حلقي من كثر ما اصارخ..
رغد: باكيتا على غفله..
العنود: حتى انا والله صدع راسي من كثر ما اصارخ وطبعا لا حياة لمن تنادي..
نوف: بصراحه ما ادري وشلون العيال يلعبون هذي اللعبه..
شجون: وانتي صادقه..
عبير: اقول مالت عليكم من لاعبين..
الهنوف: تصدقين يا رغد بغت تجي كورة ريم في وجهي..
رغد: ههههه تخيلتها..
الهنوف: انقلعي..
ريم: بلاك ما تشوفين يا الحولا..
رغد: تحسبين صديقتي مثلك يا العربجيه..
ريم: اقول تكفين انتي وصديقتك..
رغد: والله لو العب كان علمتكم اللعب على اصوله..
العنود: واضح يا رولاندينيو..
رغد: واحسن منه بعد..
عبير: بسم الله عليك واضح من رجلك المنكسره انك احسن منه..
رجعوا البنات يكملون الشوط الثاني وانتهى الشوط بـ صفر –صفر..
رغد: ما اقول الا مالت عليكم ثم مالت عليكم ثم مالت عليكم..
ريم: اووووف والله تصدقين من جد تعب..
العنود: صادقه مسكين سعد الحارثي يتعب هالتعب..
عبير: وانتي هذا اللي هامك..
العنود: ايه اكيد..
رغد: تراني مليت وش اسوي..
فجر: كان قعدتي مع الحريم..
رغد: احلفي واصدقك تخيلي شكلي مع الحريم ولا مع سواليفهم..
فجر: عادي وش فيها سواليفهم..
رغد: تجيب الهم كلها قضايا المجتمع وما ادري ايش ..كان نفسيتي تتعب هذا غير النصايح وغير طاري الزواج..
عبير: الله يجبون طاري الزواج.. اجل خلوني اروح اتميلح عندهم..
نوف: تكفين عاد من فيه اصلا من عيال غير تركي وسليمان.
رغد وريم تقلبت وجيهم 180 درجه..
عبير: تصدقين ماهي شينه مشا الله سليمان وتركي يهبلون..
الهنوف: مشكوره يا قلبي..
عبير: انا قلت تركي مو انتي..
الهنوف: انا وتركي واحد..
عبير: عاد الصراحه فيك منه وحتى مها فيها من سليمان..
مها : تسلمين..
فجر: خلاص لا عاد تمدحينهم بعدين يغترون علينا..
العنود: لالا بصراحه مشا الله اخونكم شي خطير.
الهنوف: مشا الله حتى اخوانك..
مها: صح اخوانك ما شا الله يهبلون حتى اخوان فجر..
ريم ورغد موصله معاهم وكانوا يطالعون بعض وودهم يتكلمون بس الظروف تمنعهم..
عبير: المهم خلونا من اخوانا ترى اليوم ما قبل الاخير خلونا نحلل الاجازه..
العنود: حللنها وطلعت سليمه ههههه..
عبير: هههه الله يبشرك بالخير...
نوف: خلونا نتصل على العيال يمشونا شوي ونتعشى ونرجع..
شجون: والله فكره..
ريم: تسلمين يا احلى نوف..
رغد: بصراحه مليت وانا لحالي..
عبير: المهم وحده منكم تتصل على واحد من العيال وتقنعه..
رغد: مشاري لو اقوله ما راح يرضى..
نوف: طلال ...خلونا نقنع طلال..
عبير: يله اتصلي عليه..
نوف: لا ما راح اكلمه وحده منكم تكلمه عشان يستحي ويوافق..
فجر: مين اللي راح تكلمه..
عبيركانت تطالع العنود والعنود تطالع عبير...
العنود: خلاص انا راح اكلمه..
فجر: يله خذي موبايلي..
العنود متوتره: احم احم "وتصلت"
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&
طلال كان في السياره واغاني ورقص واستهبال وانتبه لموبايله..
فواز:مين..
طلال: هذي فجر برد عليها خلنا نشوف وش تبي..الووو
العنود بس سمعت الصوت راحت فيها ووقف الكلام في حلقها:...........
طلال: الووو فجر..
العنود:أ أ الوووو..
طلال ما ميز الصوت: فجر ولا نوف؟؟
العنود: لا... انا....انا...العنود..
طلال: هلا والله وش اخبارك؟
العنود: الحمدلله بخير وش اخبارك انت" وصارت تمشي بعيد عن البنات والبنات ميتين عليها ضحك اول مره يشوفون العنود مستحيه"
طلا ل: الحمد لله..
سكتوا الاثنين.....
العنود"ياربيه وش اقول":طلال..
طلال: هلا..
العنود :أأأ الصراحه انا والبنات راح نطلبك طلب..
طلال: أمري..
العنود: نبي نتمشى شوي لان من جد ملينا من الشاليه..
طلال: ابشري ما طلبتي شي يا بنت الخال...
العنود: تسلم والله وما قصرت.
طلال: الله يسلمك ولو انتي مثل وحده من خواتي..
العنود انصدمت من كلمة خواتي: اوكي خلاص باي..
طلال: باي..
العنود: خواتي وحده من خواتي....اكيد اجل وش تبينه يقول با حبيبتي والله اني خبله..
وقعدت تضحك على نفسها وراحت للبنات..
العنود تسوي نفسها ضايق صدرها: بنات احسن الله عزاكم...اقصد ماراح نطلع..
نوف: لااااااااا لا تقولين..
فجر: غريبه طلال ما يوافق..
العنود/ لا هو موافق بس العيال ما وافقوا..
عبيرمنقهره من العنود لانها كلمت طلال وما انتبهت ان اختها تحبه اقصد ماتوقعت ان العنود تحب احد فا كان الوضع هذا يطمنها شوي :والله من النذاله هم طالعين واحنا لا..
ريم: خلونا نتصل بمشاري ونحاول فيه..
رغد: شكل مالنا الا هو..
العنود: امزح امزح وافق بس انتوا روحوا وتجهزوا..
البنات:هيّــــــــــــــا..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
العيــــــــــــــــال
فواز:وش يبون البنات..
طلال: مساكين في الشاليه لحالهم زهقوا فا يبون يطلعون..
فواز: ومين راح يطلعهم..
طلال: احنا..
مشاري: وش السالفه؟؟
طلال: البنات متصلين يبونا نمشيهم شوي..
مشاري: ايه حرام اليوم يعتبر اخر يوم لهم..
ورجعوا العيال لشاليه عشان البنات..وبعدها ركبوا البنات الجمس نفس اماكنهم امس والعيال في السيارتين الثانيه..
اللي اختلف ان فجر رجعت ورى اخر شي وشجون صارت مع نوف ومها..
وطول الطريق مشاري يطالع الهنوف والهنوف حاسه فيه بس ما تطالعه..وهو يدور أي شي يقوله عشان يسولف معها ...
ولفوا الخبر والدمام وبعدين قرروا ينزلون في مطعم ويتعشون بعدين يرجعون..
وصلوا المطعم..
ماجد: أي مطعم هذا اللي راح يكفيهم..
طلال: عادي ناخذ طاولتين ..
مشاري: يله بس امشوا..
ودخلوا المطعم وكانت هذي فرصة كل واحد يشوف حبيبه وخذوا طاولتين جنب بعض وما بينهم حواجز..وطلبوا لهم اكل..
ابتكلم لكم عن كل واحد..
فيصل ما شال عينه عن فجر وفجر ما تدري عن هوى داره..
سليمان وريم كانوا يطاعون بعض وبلغة العيون يتكلمون ..
وليد كان يشوف رغد ووده يعتذر منها بس كيف ومتى وشلون ما يدري..
رغد ما عطته وجه وكانت بين فتره وفتره تطالع تركي وتركي ما نزل عينه عنها ابد...
عبير والعنود يطالعون نفس الشخص اللي هو طلال وطلال كان يطالع عبير ويحس بشعور غريب ما يدري كيف يوصفه او كيف يفسره..
مشاري كان ميت على دلع الهنوف والهنوف ميته حياء من مشاري..
واكيد ما راح ننسى لين ومشعل كانوا مختصرين الوقت والمسافات وجالسين جنب بعض صح انه كان معاهم محمد وكان يحاول يخرب عليهم طبعا مزح ولين تعصب منه ومشعل ميت ضحك بس انهم عايشين جوهم ولين تتدلع على مشعل..أكلني..شربني..قولي كلام حلو ومشعل مستحملها عشانه يحبها بس مهما كان وده ياخذ راحته شوي ويتنفس على الاقل دقيقه بدونها بس ما يقدر على زعلها.
رغد خلصت عشى وراحت تغسل ايديها..وليد انتبه لها ولاحقها بعد ما طلعت من دورة المياه لقت وليد قبالها..
وليد: احم... رغد..
رغد تناظره بنظرة استحقار: خير وش تبي بعد..
وليد: رغد ممكن تسمعيني شوي..
رغد: وش اسمع اصلا ليش اسمعك..
وليد: رغد انا ما عمري اعتذرت من احد ولا هو من طبعي اني اعتذر حتى لو كنت غلطان بس راح اقولك انتي انا اســـــف على اللي صار امس..
رغد: وين اصرفها هذي..
وليد: والله ما كان قصدي...وانا ما ادري وشلون طلعت من طوري..
رغد: تطلع مشكلتك مو مشكلتي تغلط وتشكك في بنات الناس وبعدين تقول طلعت من طوري..
وليد: والله يا رغد ما قدرت اتحمل اشوفك مع أي احد ثاني..
رغد انصدمت من جرئته وهذا طبعه جرئ دايما:..............
وليد: ابغى منك بس شي واحد ابيك تسامحيني..
رغد: انت غلطتك كبيره ومو بس علي انا حتى على الرجال..
وليد يقاطعها: ادري والله ادري بس تكفين سامحيني..
كان وليد يترجاها وذل نفسه كثير على شانها وهي اللي تعرفه عنه انه مستحيل يتنازل ويترجى ابوه او امه..
رغد كسر خاطرها: طيب خلاص سامحتك وارجوا انه يكون درس لك بالمستقبل..
وليد انبسط: اكيد ولا راح انساه ومشكوره وما تصدقين فرحتي الحين ..رغد صدقيني انك بكلامك هذا شلتي هم كان على صدري..
رغد في نفسها" يعني هو لهدرجه يحبني..يا ربيه ياوليد وش جابك لعندي وش اللي خلاك تحبني ..بس انا ما احبك ما احبك.. والله يكسر الخاطر"..
وليد: رغد..رغد..
رغد: هلا..
وليد: ماودك ترجعين ولا مبسوطه بالوقفه..
رغد تضحك: لالا برجع..
وجوا ثنيهم وليد طالع منهم شخص ورجع شخص ثاني والابتسامه شاقه الوجه..
تركي ملاحظ هذا الشي والنار من داخل تحرقه مو قادر يتحمل يشوفهم زياده فقام من مكانه ولحقه سليمان..
سلميان: تركي وش فيك..
تركي: هذا الشين رافع ضغطي كل شوي رايح مكلم حرمتي..
سليمان: الله يهداك تقارن نفسك بولد عمها..
تركي: سليمان انت ما تفهم انا احبها..
سليمان: طيب سألت نفسك هي تحبك؟
تركي انصدم لانه ما قد سأل نفسه هذا السؤال:.....
سليمان : شفت انك مستعجل.. يعني احتمال تحبك واحتمال تحب ولد عمها..
تركي: لا بس انا احس انها تحبني..
سليمان: خلك من الاحاسيس احنا في الواقع ولازم شي صريح..
تركي: خلاص انا راح اتأكد ونشوف يا انا يا وليد..
سليمان: الله يهيدك بس طاير على طول..
ريم قامت كان ودها تشوف سليمان من زمان ما كلمته واحتمال اليوم اخر يوم تشوفه فيه..
سليمان شاف ريم جايته حس ان الدنيا مو سايعته من الفرحه وكان متشوق لشوفتها.
ريم: اهلين..
سليمان: هلا والله...كيفك؟؟
ريم: تمام..
سليمان سكت وصار يطالع بعيونها ووده يشبع ويكحل عيونه بشوفتها ويحس انه ما راح يشوفها مره ثانيه..
ريم استحت: وش فيك تطالعني كذا؟؟
سليمان: لالا ما فيني شي..
ريم: ا نشا الله انبسطتوا بالشاليه..
سليمان: ما دامك فيه اكيد راح انبسط..
ريم تضحك: هههه الله يسلمك..
سليمان" يا ناس فديت هالضحكه"
ولمحوا البنات جايين لعندهم..
ريم: سليمان باي مع السلامه..
سليمان وهو ماشي مع السلامه..
العنود قربت من ريم: رويم وش عندك مع سليمان..
ريم لفت عنها: وش عليك..
العنود: اعترفي..
ريم: وش اعترف به؟؟
العنود: انك تحبينه..
ريم تصرف: اقول روحي زين كان يسأل عن اخته..
العنود: ايه صدقتك..
ريم: والله براحتك تصدقين ما تصدقين انتي حره ..
وبعد عشر دقايق طلعوا من المطعم ورجعوا للشاليه..
واول ما وصلوا نزل الكل وما بقى الا فجر تربط جزمتها.. وفيصل اللي قاصد انه يكون اخر واحد عشانه شاف فجر تعدل جزمتها..
فيصل قرب منها بالمره وهي تحته: احم احم..
فجر رفعت عيونها على فيصل بعدين نزلتها:.....
فيصل: فجر..
فجر وهي تربط الرباط حق الشوز: هلا..
فيصل: أأأأأ وش كنت راح اقول..
فجر بقلة صبر: اممممم..
فيصل في نفسه"طيب عطيني وجه": تصدقين نسيت..
فجر خلصت ووقفت: صدق!! اجل اذا تذكرت نادني..
وتوها بتمشي الا فيصل مسك ايدها: لحظه..
فجر انصدمت وشلون تجرا ومسك ايدها وصارت تطالع بأيدها وفيه وبعدين قالت بكل برود: ممكن تترك ايدي..
فيصل استوعب الحركه وتركها بسرعه: فجر لحظه اسمعيني طيب..
فجر بقلة صبر: تذكرت السالفه..
فيصل: هي سالفه وحده ما في غيرها..
فجر كتفت ايديها: اللي هي..
فيصل: فجر ليش تعامليني كذا..
فجر: وش تبيني اعاملك ا نشا الله ؟؟
فيصل: خفي علي شوي..
فجر: وبعدين معاك عندك سالفه ولا اروح..
فيصل في نفسه" عربجيه هالبنت وما عندها وقت بس اموت فيها": الا في سالفه..
فجر: اخلص وراي شغل..
فيصل اخذ نفس وقال بسرعه: فجر لو اجي واخطبك توافقين..
فجر وكأن احد كاب عليها مويه باردده اخر شي توقعته ان فيصل ممكن يقولها اخطبك:...................
فيصل: انا حبيت ا قولك انتي اول واعرف رايك بعدين اخلي امي تكلم امك وبعدها اجي اخطبك من ابوك رسمي..
فجر تحاول تجمع لها كلمتين تقولها لفيصل لان المفاجئه شلت لسانها: بصراحه ما ادري وش اقول لك بس انت فاجئتني بالموضوع..
وراحت بسرعه وتركته..
فيصل: يا قلبي ما لقيت تحب وحده بس تحب تقسى عليك يارب حننها علي وخلها تحبني وتموت فيني..
فجر مشت وهي ما تدري وين تروح ومازالت اثار الصدمه فيها " فيصل يخطبني انا ليش وش معنى انا بالذات..والله اخر واحد توقعته فيصل معقوله " قعدت تضحك تذكرت شكلها وهي صافطه عليه وما عطته وجه وهو كان واضح انه يتلزق فيها وهي ما نتبهت وتذكرت شكل فيصل من شوي كيف مستحي وهي ولا حست فيه..
رجعت عند البنات وجلست معاهم وافكار توديها وافكار تجيبها..
نوف وش فيك تاخرتي؟؟
فجر:...........
نوف: فجر اكلمك وش فيك تاخرتي..
فجر: وش تقولين ..تكلميني..
نوف: ايه اقولك وللمره المليون وش فيك؟؟
فجر: ما فيني شي..
نوف: اكيد!! وجهك متلون الوان الطيف وبالك مو معك فيه شي؟؟
فجر عصبت: قلت لك ما فيني شي خلاص فكيني" وقامت وخلتها"
نوف: وش فيها هذي وكأني قاتله امها بس اكيد فيها شي مو من عادتها تعاملني كذا..بس مصيري اعرفه..
ناموا الحريم والرجال بس البنات قالوا بما انه اخر يوم لنا ماراح ننام وقعدوا طول الوقت عند البحر وكمان الشباب لما سمعوا ان البنات برا الشاليه طلعوا معاهم...والكل قعد يسبح الا شخص واحد اللي هي رغد كانت تطالعهم وكانت تقول في نفسها"يا حلوا اشكالكم وانتم مبسوطبن الله لا يفرق بينا امين"
مشاري: اقول طلال وش رايك نرد مقلبهم ذاك اليوم..
طلال: وانت صادق..
@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@
" نـــــــــهــــــــــــــــايــــــــة الجزء السادس عشر"
السبت مايو 29, 2010 10:54 am